Люк Бессон 2016 йил январида илмий-фантастик фильмни суратга олишни бошлайди

Франциялик таниқли режиссёр Люк Бессон 2016 йил январь ойида «Валериан ва 1000 сайёра шаҳри» номли илмий-фантастик фильмни суратга олишга киришади. Бу ҳақда унинг ўзи АҚШнинг Сан-Диего шаҳрида бўлиб ўтаётган Comic-Con комикслар ва поп-маданият фестивалида маълум қилди, деб хабар бермоқда «ТАСС».

«Бу менинг ижодий фаолиятимдаги энг таваккалчи лойиҳа бўлади. 2009 йилда Жеймс Кэмероннинг «Аватар» фильмини кўргач, фильм сценарийсининг биринчи вариантини йўқ қилган эдим. Мен уни оддийлиги учун чиқинди қутисига ташладим, бу унинг асосий камчилиги эди. Кэмерон ҳайратланарли дунё яратиш мумкинлигини кўрсатиб берди ва мен бир бошидан бошлаш кераклигини тушундим», − деди Бессон.

Бюджети 180 миллион долларлик фильмда бош ролларни америкалик актёрлар Дейн ДеХаан ва британиялик топ-модель Кара Делевинь ижро этади. Фильмда жами беш нафар актёр иштирок этади, қолган барча ишни компьютер графикаси бажаради. Илк марта 1967 йилда француз ёзувчиси Пьер Кристин ва француз рассоми Жан-Клод Мезье томонидан ёзилган комикс асосида ишланадиган фильм воқеалари 26-асрда бўлиб ўтади.