Йозеф Блаттер: ФИФА конгресси қолишимни сўраса ҳам истеъфога чиқаман
Халқаро футбол федерациялари президенти Йозеф Блаттер ФИФА конгресси ундан қолишни сўраса ҳам истеъфога чиқишини айтиб ўтди, деб хабар қилади «ТАСС».
Блаттер 29 майда ўтказилган ФИФА конгрессида навбатдаги муддатга сайланганди, аммо орадан тўрт кун ўтиб, коррупцион можаролар туфайли ўз лавозимидан кетишини маълум қилди. 20 июль куни ФИФА ижроқўмининг навбатдан ташқари йиғилиши ўтказилади ва унда ташкилот президенти сайланадиган сана эълон қилинади. Унгача эса Блаттер ФИФА раҳбари вазифасини бажариб туради.
«Мен сайловдан кейин ўз лавозимимда қолмайман, — деди 79 ёшли швейцариялик. — Ҳаттоки ФИФА конгресси қолишимни сўраса ҳам мен барибир истеъфога чиқаман».
27 май куни Цюрихда коррупцияга аралашгани гумон қилинган ФИФАнинг 7 нафар амалдори қўлга олинганди. Жами 14 кишига нисбатан айбловлар илгари сурилган. АҚШ юстиция вазирлиги маълумотларига кўра, улар 24 йил давомида 150 миллион доллар миқдорида пора олган.
