Пентагон: АҚШ Россиянинг илгариги мавқейини қайтариш ҳаракатларига қарши туради
АҚШ мудофаа вазири Эштон Картер Берлинга ташрифи чоғида Америка ЕИдаги шериклари билан Шарқий Европага оғир қурол-аслаҳаларни жойлаштириш бўйича режаларни муҳокама қилаётганини тасдиқлади. Бу ҳақда Германияда чоп этиладиган Frankfurter Allgemeine Zeitung нашрига асосланиб, «РИА Новости» хабар қилади.
«Бундай имкониятларни кўриб чиқиб, шерикларимиз билан муҳокама қиляпмиз. Биз Россиянинг илгариги, худди совет давридаги каби таъсир доирасини ўзига қайтариш борасидаги ҳаракатларига қарши турамиз», — деди Картер Украинадаги инқирозни назарда тутиб.
Пентагон раҳбари Европада ҳарбий техника машқлар ўтказиш ва ҳарбий хизматчилар тайёрлаш учун доимо шай туришини таъкидлади. Картер Германия маъмурларининг мамлакат ҳарбий бюджетини ошириш ҳақидаги ниятларини маъқуллади, аммо буни ҳали етарлича эмас, деб ҳисоблашини билдириб ўтди.
