Голландияда 12 ёшдан кичик болаларга эвтаназияни қўллашга рухсат беришни таклиф қилишди
Голландия болалар тиббиёти уюшмаси оғир дарддан қийналаётган ва соғайиб кетишга имконияти бўлмаган болалар, уларнинг ёшидан қатъий назар эвтаназияга ҳақли бўлиши керак, деган таклиф билан чиқди. Бу ҳақда «Koрреспондент.net» De Volkskrant газетаси маълумотига таяниб хабар беради.
Ҳозирги пайтда эвтаназия учун ёш чеклови 12 ёшни ташкил этади. «Бу чеклов олиб ташланиши керак. Ҳар бир алоҳида ҳолатда боланинг ақли расолиги ва ўз ҳаракатлари учун жавоб бера олишидан келиб чиқиб қарор қабул қилиш керак», — деб ҳисоблайди шифокорлар.
«Ёш бўйича чеклов муаммоларни келтириб чиқаради. Биздаги тизим эвтаназияни фақат янги туғилган гўдаклар ҳамда 12 ёш ва ундан катта болаларга нисбатан қўллашга рухсат беради. Бироқ болалар анча эрта ёшида ҳам ўз ҳаракатлари нимага олиб келишини яхши тушунади», — дейди ташкилот вакили, профессор Эдуард Верхаген.
