Самарқанд вилоятининг Ургут туманида инвестиция дастури асосида барпо этилган туғруқ мажмуаси ва кўп тармоқли марказий поликлиника бинолари фойдаланишга топширилди, деб хабар бермоқда ЎзА.
Шу муносабат билан ўтказилган тадбирда Президентимиз раҳнамолигида соғлиқни сақлаш тизимини ислоҳ қилиш жараёнида тиббиёт муассасалари моддий-техник базасини мустаҳкамлаш, аҳолига кўрсатилаётган хизмат сифати ва самарадорлигини янада оширишга алоҳида эътибор қаратилаётгани таъкидланди.
Хусусан, 2012—2014 йилларда Самарқанд вилоятида ўнга яқин туман тиббиёт бирлашмасини модернизация қилиш ишлари амалга оширилди. Муассасаларда 68 миллиард 300 миллион сўмлик қурилиш ва реконструкция ишлари бажарилди.
Ургут тумани тиббиёт бирлашмасининг 100 ўринли туғруқ мажмуаси ва 150 қатновга мўлжалланган кўп тармоқли марказий поликлиникаси қурилиши ҳам модернизация ишлари самараси бўлди.
– Мазкур тиббиёт муассасаларида «Бунёдкор» масъулияти чекланган жамияти қурувчилари томонидан 4 миллиард 100 миллион сўмлик қурилиш-реконструкция ишлари амалга оширилди, – дейди Ургут тумани тиббиёт бирлашмаси бошлиғи ўринбосари Хайрулла Қаюмов. – Шунингдек, 508 миллион сўмлик қаттиқ ва юмшоқ жиҳозлар келтирилди. «Саломатлик-3» лойиҳаси асосида замонавий ташхис ускуналари ўрнатилди.Буларнинг барчаси халқимизга замонавий ва юқори сифатли тиббий хизмат кўрсатиш имконини беради.
Туман тиббиёт бирлашмасини модернизация қилиш доирасида жорий йилда терапия, хирургия, тез тиббий ёрдам ҳамда болалар бўлимларини реконструкция қилиш ишлари давом эттирилмоқда. 2016 йилда эса бирлашманинг Жартепа бўлими ҳамда юқумли касалликлар бўлимини замон талабларига мослаштириш режалаштирилган.
Изоҳ (0)