Одил Аҳмедов: Мухлислардан қарзимиз бор
Учинчи марта «Йилнинг энг яхши футболчиси» номинациясида ғолиб бўлган Ўзбекистон миллий терма жамоаси ва Россиянинг «Краснодар» клуби ярим ҳимоячиси Одил Аҳмедов турли мавзулардаги саволларга жавоб берди. Бу ҳақда «Darakchi.uz» хабар бермоқда.
Футболчи «Йилнинг энг яхши футболчиси» номинациясидаги ғалабаси билан боғлиқ хурсандчилик ҳақида айтиб ўтди: «Тўғриси, ўша пайтда Ўзбекистонда бўлмаганим учун бу хабарни интернет орқали эшитдим. Менимча энг охирги бўлиб ўзим хабар топдим шекилли, шунинг учун хурсандчилигимни менга табрик йўллаганлар билан бўлишдим».
Савол: «Анжи»да кўплаб дунё футболи юлдузлари тўп сурарди, «Краснодар»да ундайлар кам, бу жамоада ўзингизни қандай ҳис қиляпсиз?
Жавоб: Тўғри, «Краснодар»да дунё юлдузлари кам, лекин жамоавий ўйин яхши йўлга қўйилган. «Краснодар»да ишларим яхши, барча шароитлар қониқтиради. Айниқса, оиламга маъқул. Иқлими юртимизникига ўхшаб кетгани учунми худди уйда юргандек ҳис қиламан ўзимни.
Савол: Англиянинг «Арсенал» клубига ўтишингиз ҳақидаги гаплар роса болалаган эди, лекин афсуски, мухлисларингизнинг умиди пучга чиқди. Янги жамоангиз Европа Лигасида тўп суради, балки скаутларнинг эътиборига тушиб, Европанинг етакчи жамоаларидан таклиф тушса, ўтасизми?
Жавоб: Аввало, футболда ҳамма нарса биз ўйлагандек осон битиб кетавермайди. Қолаверса, ўша пайтда «Анжи» жамоасига кўпроқ керак бўлганим учун ҳам кета олмаганман. «Краснодар»га ўтганимга эса ҳали кўп вақт бўлгани йўқ. Бу ерда ҳам жамоа билан ютуқларга эришишни, клуб мухлисларининг ишончини оқлашни истайман. Агар Европанинг машҳур клубларидан таклифлар бўлса, албатта, хурсанд бўлардим.
Савол: Кўпчилик сизни терма жамоадан кўра клубда яхши ўйнайди дейди, шунга муносабатингиз қанақа?
Жавоб: Билмадим... Терма жамоада ҳам, клубда ҳам доим яхши ўйин намойиш этишга ҳаракат қиламан.
Савол: Миллий футболимиз кейинги жаҳон чемпионатига чиқишига кўзингиз етадими?
Жавоб: Жаҳон чемпионатига чиқиш учун қўлимиздан келган барча ишни қиламиз! Насиб қилса, чиқамиз ҳам. Мухлислардан қарздормиз. Ўйлайманки, терма жамоамизни таъқиб этиб келган омадсизликлар ортда қолди.
Савол: Ўзингизни ампулангиздаги қайси футбол юлдузига ҳавас қилгансиз?
Жавоб: «Реал Мадрид»нинг афсонавий ўйинчиси Зейниддин Зиданга ҳавас қилганман.
Савол: Бутун дунё эътиборидаги Месси ва Роналду баҳсида бу йил омад кимга кулиб боқади деб ўйлайсиз?
Жавоб: Бу йил Месси Роналдуга қараганда анча яхши ўйин кўрсатяпти. Шу тарзда давом этса, менимча у яна бир бор «Олтин тўп»ни қўлга киритади.
Савол: Футболчиларнинг карьераси қисқа. Футболдан кетганингиздан кейин сизни қайси амплуада кўрамиз?
Жавоб: Ҳали узоқ йиллар футбол ўйнаш режам бор, шунинг учун футболдан кетгандан кейинги ҳаётим ҳақида ҳозирча ўйлаб кўрганим йўқ.
Савол: Психологларнинг фикрича, нафақат футболчилар, балки футбол соҳасига қизиққанлар ҳам барча соҳаларда муваффақият қозонишга ҳаракат қиларкан... Омадингиз чопмаган пайтларда кўнглингиздан нималар кечади?
Жавоб: Омадсизликни тезда унутиб, яна олдинга қадам босаман ва яна ютуқларга эришишга ҳаракат қиламан.
Савол: Энди оилавий саволларга ўцак, акангиз кино оламига алоқадор, уларнинг фильмдаги роллари сизга маъқулми?
Жавоб: Менга-ку, маъқул. Лекин, аввало, кино мухлисларига маъқул бўлиши керак.
Савол: Сизга ҳам фильмларда рол ижро этишни таклиф қилишганми?
Жавоб: Қилишган. Лекин мен рози бўлмаганман. Чунки рол ўйнаш қўлимдан келмайди, ҳар бир ишни ўз профессионали бажаргани яхши. Чумчуқ сўйса ҳам, қассоб сўйсин, деб бекорга айтишмайди.
Савол: Фарзандларингизда ҳам футболга қизиқиш борми?
Жавоб: Фарзандларим кўпроқ санъатга қизиқади, амакисига ўхшагиси келади. Қайси соҳага қизиқишига қараб, барча шароитларни яратиб бераман. Чунки ўз вақтида ота-онам ҳам менга шундай имкониятларни муҳайё қилишган.
Савол: Укангиз Азим Аҳмедов ҳам миллий терма жамоада тўп суряпти, уни қўллаб-қувватлаб турасизми?
Жавоб: Узоқда бўлсам-да, қўнғироқ қилиб, керакли маслаҳатларни бериб тураман. Зарур пайтда танқид ҳам қиламан. Танқидимни тўғри қабул қилади. Ўзига яраша ютуқларга ҳам эришяпти. «Навбаҳор»нинг асосий таркибида. Шундай бўлса-да, ҳали камчиликлари кўп. Ўз устида мунтазам ишласа, келажакда ундан яхши футболчи чиқади, деб ўйлайман.
Савол: Машғулотлардан бўш вақтингизда тез-тез театр, концертларга бориб маданий ҳордиқ чиқаришингизни биламиз. Охирги марта қайси концерт ёки театрга кирдингиз? Кўрган театрингиздан олган таассуротларингиз?
Жавоб: Охирги марта оилам билан Муқимий театрида намойиш этилган «Антиқа совчилар» спектаклини томоша қилдик. Жонли ижрони томоша қилиш барибир завқли. Комедия жанридаги бу спектаклни томоша қилиб, ҳордиқ чиқардик.
Одил Аҳмедов «Мухлислар ишончини оқлашга ҳаракат қиламиз», – дея фикрига якун ясади.
