Бухородаги теннис турнирида Жўрабек Каримов чорак финалга чиқди

Бухоро шаҳрида теннис бўйича «Фьючерс» туркумига кирувчи мукофот жамғармаси 15 минг АҚШ долларидан иборат бўлган турнирда чорак финал иштирокчилари маълум бўлди, деб хабар бермоқда «Olamsport».

«Дилкушо» теннис кортлари мезбонлик қилаётган мусобақанинг асосий тўрида саккиз нафар теннисчимиз ўз иштирокини бошлаган бўлса, улардан фақат бир нафари баҳсларни давом эттиряпти.

Мусобақага имтиёзли равишда қўйилган истеъдодли теннисчимиз Жўрабек Каримов иккинчи даврада қирғизистонлик Данияр Дулдаевга қарши кортга чиқди ва тажрибали рақибидан икки сетда ҳам бир хил 6:4 ҳисобида устун келди. Энди Жўрабек бугун чорак финалда турнирнинг тўртинчи ракеткаси россиялик Антон Зайсев билан ҳисоб-китоб қилади.

Яна бир ҳамюртимиз Азизбек Луқмонов эса чорак финалга чиқа олмади. Асосий тўрга имтиёзли чипта билан қўйилган Луқмонов ҳиндистонлик Вишну Варданга 1:6, 4:6 ҳисобида имкониятни бой бериб қўйди.