Москвада 40 дан ортиқ ҳаво ҳужумидан мудофаа тизими минораси ўрнатилди

Россия ҳукумати Украинанинг ҳужум таҳдидлари фонида Москвага 40 дан ортиқ қўшимча ҳаво ҳужумидан мудофаа тизими минорасини ўрнатди. Бу ҳақда Bild хабар берди.

Пойтахт атрофида босқичма-босқич ҳаво ҳужумидан мудофаа тизими шакллантирилмоқда. Сунъий йўлдош тасвирларига кўра, 2025 йилда шаҳар яқинида “Панцир-С1” зенит-ракета тизимлари (ЗРПК) ўрнатилган қўшимча 43 та минора қайд этилган. Гап совет давридаги 50 километр радиусга эга “кичик ҳалқа” ҳаво мудофааси тизимини қайта тиклашни давом эттириш ҳақида кетмоқда. Бу тизим совуқ уруш даврида амалда қўлланмаган.

Тизимлар Марказий ҳалқа автомобил йўли ва унга параллел бўлган “кичик бетонка” йўли бўйлаб жойлаштирилмоқда. Мудофаа воситлари бошқа ҳудудлардан ҳам олиб келинмоқда. Бу эса расмийлар айнан Москвани ҳимоя қилишга эътибор қаратаётганидан далолат беради.

2025 йилда “Панцир”ларнинг янги позициялари Зеленоград ва Подолск яқинида, Гжели туманидаги Марказий ҳалқа автомобил йўли кесишмасида, Наро-Фоминск яқинидаги собиқ радиотехника маркази ҳудудида ҳамда Машинасозлик илмий-тадқиқот институти полигони яқинида пайдо бўлди. Бундан ташқари, Домодедово ва Жуковский аэропортлари яқинида бир нечта зенит-ракета тизимлари ўрнатилди.

Дронлар таҳдиди Путиннинг хавфсизлик чораларини кескин кучайтиришга мажбур қилди

Financial Times маълумотларига кўра, Россия раҳбари сафарларини кескин қисқартирган, президентнинг энг яқин аппарати ходимларига эса телефон ва интернетга уланган ҳар қандай қурилмадан фойдаланиш тақиқланган.

“Путин суиқасдлардан қўрқади ва дронлар эҳтимолий ҳужум воситаси сифатида кўрилмоқда. Шу сабабли у тобора кўпроқ вақтини ерости бункерларида ўтказмоқда”, дея таъкидлади нашр суҳбатдошлари.

Май ойи бошида Путин ҳаво ва ракетага қарши мудофаа қўшинларини ўз ичига олган Россия ҳаво-космик кучлари қўмондонини алмаштиргани маълум бўлди. Генерал Виктор Афзалов ўрнига бу лавозимга генерал-полковник Александр Чайко тайинланди. Кадрлар ўзгариши ҳаво ҳужумидан мудофаа кучлари қайтара олмаган бир қатор дрон ҳужумларидан кейин содир бўлди.

4 май кун Кремльдан тахминан 6,5 километр узоқликда жойлашган турар жой мажмуасига дрон келиб урилганди. Мазкур воқеалар фонида Зеленский дронлар Москвадаги парадда ҳужум қилиши мумкинлигини истисно этмади. У бу йилги ёз “Путин учун ҳал қилувчи палла” бўлишини таъкидламоқда.