Нетаньяху Эрон ядро дастури бўйича келишув Исроилга хавф солишини айтди

2 апрель куни олти томонлама музокаралар натижаларига кўра Эрон ядро дастури бўйича эришилган битим Исроилни хавф остига қўяди. Бу ҳақда Исроил бош вазири Биньямин Нетаньяху баёнотига таяниб, Meduza хабар берди.

Исроил бош вазири сўзларига кўра, ушбу битим Эронни ядро қуроли яратишдан ҳеч ҳам узоқлаштирмайди, балки унга яқинлаштиради, бу эса Яқин Шарқ минтақасига «даҳшатли уруш» хавфини солади.

Муқобил ечим сифатида Нетаньяху мақбулроқ битим ишлаб чиқилгунига қадар Теҳронга босимни кучайтиришни таклиф қилди.

Эслатиб ўтамиз, 2 апрель куни Эрон ва халқаро воситачилар «олтилиги» Эрон ядро дастури бўйича сиёсий келишувга эришди. Битимни тайёрлаш жараёни 30 июнгача якунланади. АҚШ Давлат департаменти баёнотида айтилишича, Эрон ядро дастури устидан назорат турли йўналишлар бўйича 10 йилдан 25 йилгача давом этади.