Porsche компанияси «Форсаж» фильмлари юлдузи Пол Уокер ҳалок бўлган авария айбдорини эълон қилди, дея хабар бермоқда «Вести.ru». Компания вакиллари ҳалокатли йўл-транспорт ҳодисасида ҳайдовчи Рожер Родас айбдор деб ҳисоблайди. Родаснинг беваси Porsche’ни эрининг ўлимида айблаб, судга даъво бергач, компаниянинг жавоби шундай бўлди.
Ўз шикоятида Кристин Родас эри ва унинг актёр дўсти ўтирган, 2005 йилда чиқарилган қизил Porsche автомобили носоз бўлганини таъкидлаган.
Ичида йўловчи ўриндиғидан жой олган Пол Уокер ва ҳайдовчилик вазифасини бажараётган Рожер Родас бўлган Porsche кўча чироғи устунига катта тезликда келиб урилган ва ёниб кетган эди. Натижада уларнинг ҳар иккаласи ҳалок бўлган. Автомобиль ҳам, қурбонлар ҳам «тиклаб бўлмайдиган аҳволда» бўлган.
Porsche компанияси аёлнинг айбловларини рад этди ва машинага ҳамда ҳайдовчи ва йўловчига етган зарарларнинг барчасида Родасни айбдор қилиб кўрсатди. Автомобиль ишлаб чиқарувчи вакиллари таъкидлашича, у машинани хавфли равишда ҳайдаб, «хавфга онгли ва ихтиёрий тарзда юзланган» ва жонини хатарга қўйган.
Эслатиб ўтамиз, америкалик актёр Пол Уокер 2013 йил декабрида Лос-Анжелесда содир бўлган автоҳалокат натижасида ҳаётдан кўз юмган эди.
Воқеа актёрнинг хайрия автошоуси чоғида рўй берган. Унда Пол Уокер ва автосалон хўжайини Рожер Родас янги Porsche Carrera GT’ни синовдан ўтказаётган эди.
Изоҳ (0)