Жанубий Корея ҳарбий хизматчилари 1 апрелдан КХДР билан чегарадош туманларда 1950—53 йиллардаги Корея уруши давридан қолган ер устидаги миналарни қидириш ва йўқ қилиш бўйича ишларни бошлайди, деб ёзади «РИА Новости».

Операция жорий йилнинг 27 ноябригача давом этади. Режага кўра, қидирув Кёнгидо провинциясининг еттита шаҳри ҳудудида жами 60 минг квадрат метр майдонда амалга оширилади.

Жанубий Корея Корея урушидан сўнг қолган ер усти миналарини қидириш ва йўқ қилиш ишларини 2005 йилдан буён олиб боради. Ўтган йилнинг ўзидагина ҳарбий хизматчилар 312 та танкка қарши ва 121 та пиёда аскарларга қарши миналарни зарарсизлантиришга муваффақ бўлган. Операция бошидан буён жами 25 188 та ер усти миналари топилган ва йўқ қилинган.