Самарқанд вилоятининг Булунғур туманида ичкиликбозликка берилиб кетган эркакнинг ҳаётига ўз оиласи аъзолари нуқта қўйди, деб ёзади «На посту» газетаси.
Бу аёлнинг иккинчи эри бўлиб, биринчи турмушидан бир ўғли, иккинчи турмушидан икки ўғли ва бир қизи бор эди. Тўнғич ўғлини иккинчи эри чиқиштирмагач, аёл уни ўзининг ота-онасиникига жўнатиб юради. Ўғил вақти-вақти билан онаси ва укаларидан хабар олиб туради.
Қайд этилишича, бир куни эркак одатдагидек маст ҳолда уйга қайтгач, аёл қизининг қичқирганини эшитади. Уйга кирган аёл даҳшатдан қотиб қолади: у эри ўзининг вояга етмаган қизини зўрлашга уринаётганига кўзи тушади. Бор кучи билан эрини суриб, қизини қочириб юборади.
Сўнгра ўзининг биринчи турмушидан бўлган 20 ёшли тўнғич ўғлини, шунингдек 18 ёшли иккинчи ўғлини чақиради. Уларга бўлган воқеани айтиб бериб, эрини ўлдиришни таклиф қилади. Қизи аввал ҳам отасидан шикоят қилганини, бироқ у алдаяпти деб ўйлаганини айтади ва ундан қутулишнинг бошқа чораси йўқлигини маълум қилади.
Ярим тунда, эркак ухлаб ётганда ўғиллар хонага кириб, уни темир қувур бўлаги билан бир неча марта уришади, кейин эса бўйнига арқон боғлашади, сўнгра жасадни қуриб қолган каналга олиб бориб ташлашади.
Судда аёл ўғилларини жиноятга бошлаганини тан олди. Самарқанд вилояти жиноят ишлари бўйича судьяси бошчилигидаги суд аёлни 14 йилга, тўнғич ўғлини 15,5 йилга, иккинчи ўғлини 6 йилга озодликдан маҳрум этди.
Изоҳ (0)