Германиянинг Bild нашри Франциядаги Альп тоғларида ҳалокатга учраган Airbus А320 самолёти «қора қути»сининг тўлиқ стенограммаси (шартли белгилар билан ёзилган матн расшифровкаси)ни эълон қилди, деб ёзади «Газета.ru».
Таъкидланишича, ёзув 1,5 соат давом этади. Хабар берилишича, ёзувларда биринчи учувчининг кабинага қулфланиб олган Андреас Любицга «жин ургир эшикни оч» дея бақиргани, орқа фонда эса йўловчиларнинг қичқириқлари аниқ эшитилган.
Аввалроқ Airbus А320 самолёти иккинчи учувчисига нисбатан «қасддан қотиллик қилиш тўғрисидаги» иш қўзғатилди. Марсель прокурори иккинчи учувчи Андреас Любиц онгли равишда баландликни пасайтирганини айтди. «Унинг буни нима сабабдан қилгани ҳозирча бизга маълум эмас, биз шуни биламизки, самолётни у қулатган», — дея таъкидлади Робен.
Эслатиб ўтамиз, 24 март куни Барселонадан Дюссельдорфга парвоз қилаётган Airbus А320 самолёти Франция жанубида, Альп тоғлари устида ҳалокатга учраши оқибатида лайнер бортида бўлган 150 кишининг барчаси ҳалок бўлган эди.
Изоҳ (0)