Жорий йилнинг май ойида Жаҳон иқтисодиёти ва дипломатия университетида Бирлашган Миллатлар Ташкилотининг 70 йиллиги ҳамда университетда анъанага айланган БМТ Моделининг 10 йиллигига бағишланган навбатдаги БМТ Модели ўтказилади.
Аввалги конференциялардан фарқли равишда бу йилги БМТ Моделини ноодатий тарзда ўтказиш учун унга 3 кун ажратилди.
Ушбу 3 кун белгиланган мавзуларни ҳақиқий дипломатлардай БМТ руҳида муҳокама қилиш имкониятини тақдим этиш билан бирга, яна қатор фойдали ва қизиқарли тадбирларни қамраб олади.
Конференцияда 3 қўмита – БМТ Хавфсизлик Кенгаши, Жаҳон соғлиқни сақлаш ташкилоти ҳамда БМТ Бош Ассамблеясининг 5-қўмитаси айни дамда долзарб бўлган мавзулар бўйича иш олиб боради. Конференциядан аввалроқ, апрель ойида тадбир иштирокчилари Ўзбекистондаги кўзга кўринган профессорларнинг анжуманда муҳокама қилиниши кўзда тутилаётган мавзулар бўйича маърузаларида қатнашиш имкониятига эга бўлади.
Таъкидланишича, иштирокчиларга яна кўплаб кутилмаган совғалар тайёрланмоқда.
ЖИДУдаги БМТ Моделида иштирок этиш истагида бўлганлар 21 мартдан 5 апрелга қадар ўзлари ҳақидаги резюме ҳамда анжуманда қатнашишдан кўзлаган мақсадларини инглиз тилида ёзган ҳолда uwedmun2015@gmail.com электрон почтасига жўнатиши лозим.
Маълумот учун, ЖИДУдаги БМТ Модели илк бор 2005 йилда ташкил этилган. Бугунга қадар ўтказилган конференцияларда ЖИДУ талабаларидан ташқари, Тошкент Халқаро Вестминстер университети, Тошкентдаги Сингапур менежментни ривожлантириш институти, Ўзбекистон давлат жаҳон тиллари университети, Тошкент давлат шарқшунослик институти ва бошқа ОТМ талабалари фаол қатнашиб келган.
Изоҳ (0)