8 март Халқаро хотин-қизлар байрами муносабати билан Тошкент шаҳрида аёлларни ўзига хос тарзда табриклаш мақсадида турли қизиқарли акциялар ташкил этилди.
Жумладан, аввал хабар берилганидек, йўл-патрул хизмати ходимлари аёл ҳайдовчиларни тўхтатиб, уларга байрам муносабати билан гул совға қилишди.
MyTaxi.uz такси хизмати эса 8 март куни Тошкентнинг энг таниқли бизнесменлари ўз автомобилларида аёлларга такси сифатида бепул хизмат кўрсатишини ташкиллаштирди.
Шунингдек, алоҳида ҳайдовчилар ҳам аёлларни бепул элтиб қўйишган. Тошкентдаги Халқаро Вестминстер университети талаба йигитлари ўз автомобилларида университет талаба қизларига хизмат кўрсатган. Бундан ташқари, CityTaxi хизмати ҳайдовчилари ҳам аёлларга гул совға қилган.
Шунингдек, Facebook’даги «Potrebitel.uz» ва «Обшчественний контрол» гуруҳларида Тошкентнинг қатор йирик супермаркетлари ва савдо марказларида байрам муносабати билан акциялар ўтказилгани маълум қилинган.
Хусусан, Korzinka.uz супермаркетлар тармоғида аёллар учун жонли ижрода қўшиқ куйланган ва гуллар совға қилинган. Samarqand Darvoza савдо мажмуасида ҳам аёл мижозларга гуллар совға қилинган. Мажмуада жойлашган Home Market супермаркетида ҳам аёлларни ўзига хос совғалар билан кузатишган. Next савдо марказида эса аёллар скрипка оҳанглари билан қарши олиниб, гуллар билан кузатиб қўйилган. MegaPlanet савдо марказидаги супермаркетда қўшимча кассалар ташкил қилиниб, чиқишда аёлларга Rafaello конфетлари совға қилинган.
Arba.uz интернет-дўкони буюртмаларга қўшиб аёллар учун совғаларни ҳам етказиб берган. «Капиталбанк»даги Western Union бўлимида аёллар ўзига хос совғалар билан қарши олинган. Чилонзорда эса аёлларнинг автомобилини ювиб бериш хизмати бепул кўрсатилган.
Изоҳ (0)