Чемпионлар лигаси доирасида «Локомотив» ва «Фулад» жамоалари ўртасида кечган учрашув якунига етгач ўтказилган матбуот анжуманининг иккинчи қисмида Вадим Абрамов иштирок этди, деб хабар беради «Uff.uz».
«Ўйинни ҳамма кўрди. Мавсумдаги илк ўйин шундай кечади, аслида, – деб гап бошлади Вадим Абрамов. – Бир қатор футболчилар ҳаяжондан ўзини йўқотиб қўйди. Бунақаси учраб туради. Гол уриб олганимиздан сўнг хотиржамликка берилдик ва рақиб ўйинига мослашиб қолдик. Бу ‘Локомотив’ учун Чемпионлар лигасидаги илк очко ҳисобланади. Умид қиламанки, бу очко ягона бўлмайди».
Савол: Абдуҳолиқовнинг ўйинидан қаноатландингизми?
Жавоб: Футболда фақат гол уриш эмас, балки бошқа вазифаларни ҳам бажариши лозим. Темурхўжа жамоавий ўйинда катта фойда бера олди. Унинг ўрнига тушган Алишер Шоғуломов ўз олдига қўйилган вазифани унча тушунмаган кўринади.
Савол: Жасур Ҳасанов 90 дақиқа ўйнай олмайдими?
Жавоб: Ўйнай олади, албатта. Аммо биз тактик қарашлардан келиб чиқиб, уни иккинчи бўлимга олиб қўйган эдик. Агар биз ҳисобда олдинда бўлганимизда рақиб ҳужум қилишга мажбур бўларди ва қарши ҳужумларда Жасурдан фойдаланган бўлардик. Афсуски, бу режамиз амалга ошмади ва Ҳасанов дуранг бўлиб турган вақтда ўйинга қўшилди.
Савол: Лутфулла Тўраев келгуси ўйинда иштирок этмаслиги муаммо туғдирмайдими?
Жавоб: Мен унга танаффус вақтида эҳтиёт бўлишни тайинлаган эдим. Унинг ўрнини боса оладиган футболчилар таркибда бор.
Савол: Сиз ўтган ўйинда бир дақиқа ҳам ўйнамаган дарвозабонни майдонга туширган эдингиз. Бу сафар эса Сардор Мирзаев ҳимояда, Абдуҳолиқов эса қанотда ўйнади. Нима учун янги Америка очмоқчи бўлмоқдасиз, ҳаммани ўз ўрнига қўйсангиз бўлмайдими?
Жавоб: Мен ҳеч нарсани исботламоқчи эмасман. Ўтган ўйинда майдонга тушган дарвозабонга келсак, биз машғулотларда иштирок этган Каримовга ишонч билдирган эдик. Маъмур ўтган ўйин олдидан тўлиқ тайёр эмас эди, шу сабабли захирада қолди. Аброр эса ўртоқлик ўйинларида ўзини кўрсатган эди. Шу сабабли унга ишонч билдирдик. Мирзаевга келсак, у бугун ўнг қанот ҳимоясида ҳам ўйнади, аммо эътибор берган бўлсангиз, «Фулад» бир ҳужумчи билан ўйинни бошлаганди. Шу сабабли тўрт ҳимоячини ортда ушлаб туришни истамадик. Сардор аслида олдинда ўйнаши керак эди. Биз бугун уч ҳимоячи билан ўйнадик.
Савол: Бугунги ва аввалги ўйинларда ғалабага эришилмагани боиси нимада? Бу борада сизнинг ҳам айбингиз борми?
Жавоб: Бизда жуда яхши таркиб бор. Бу футболчилар икки ўйинда майдонга тушиб, қўлидан келган барча ишни бажарди. Менинг айбимга келсак, нима дейишга ҳам ҳайронман. Футболда кимдир ғалаба қозонади, кимдир эса мағлуб бўлади. Биз қўлимиздан келган ишни қилмоқдамиз. Футболда кўтарилишлар ва пасайишлар бўлиб туради. Айтайлик Мадриднинг «Реал» клуби ҳам мавсумни ёмон бошлаган эди. Энди бўлса бу жамоа Испания чемпионатида пешқадам. Демак Анчелотти ҳам айбдор эканми? Яхши от кейин чопади. Биз ҳам яхши натижага эришамиз, деб ўйлайман.
Савол: Сиз ҳақингизда матбуотда кўп гап-сўзлар ёритилмоқда. Бу ҳолат жамоага ортиқча босим юкламайдими?
Жавоб: Йўқ, ҳеч қандай босимни ҳис қилганимиз йўқ. Мен имкон қадар газеталарни ўқимасликка ҳаракат қиламан. Биз ўз ишимизни қилмоқдамиз, мухлисларни стадионга йиғиш ҳаракатидамиз. Менинг ишим қай даражада ёмонлиги мана шу мухлислар замирида кўринади.
Савол: Суперкубок ҳақида нима дея оласиз?
Жавоб: Мавсум бошида бундай масъулиятли ўйинлар бўлмоқда. Бундай ҳолатда футболчилар бироз асабийлашиши мумкин. Мен имкон қадар уларни хотиржам қилишни истамоқдаман. Суперкубок яхши мусобақа ва биз уни ютишни жуда истаймиз. «Пахтакор» яхши жамоа ва бу жамоани мағлуб этиш учун қўлимиздан келган барча ишни қиламиз.
Изоҳ (0)