4 март куни «РИА Новости» давлат агентлиги фотобанкида ҳибсга олинган Сахалин вилояти губернатори Александр Хорошавиннинг самолётдаги сурати пайдо бўлди, дея хабар бермоқда Meduza. Бироқ «RIP Новости» аноним микроблоги ёзишича, бу расм сохта.
Қалбаки фотосуратга 2013 йили Қозоғистоннинг Vox Populi фоторепортажлар сайтида чоп этилган расм асос қилиб олинган, унда Одил исмли самолёт йўловчиси тасвирланган. Репортаж бортдаги таомларни тайёрлашга бағишланган эди.
Кўриниб турганидек, «РИА Новости» базасидаги сурат асл расмдан Хорошавиннинг калласи ва йўловчи қўлидаги кишан билан фарқ қилади.
Кейинроқ фотосурат «РИА Новости» базасидан олиб ташланди. Агентлик ахборот хизмати расмнинг хатолик туфайли чоп этилганини маълум қилиб, обуначилардан узр сўради.