Жорий йилнинг 5 январь куни Korean Air авиакомпаниясининг Сеул−Тошкент йўналишидаги рейсни амалга ошираётган самолёт учувчисининг кўзига яшил рангдаги нур туширилган, деб хабар бермоқда «12news.uz». Ушбу ҳолат юзасидан тергов ҳаракатлари олиб борилмоқда.

Ҳуқуқни муҳофаза қилиш органлари вакилларининг маълум қилишича, ўтган йилда бешта лазер безорилиги ҳолати кузатилган. Жумладан, 2014 йил 25 декабрь куни Фарғона−Москва самолётининг учувчиси кўзига лазер таёқчаси ёрдамида нур туширган фарғоналик шахс маъмурий жавобгарликка тортилган.

Ўзбекистон ҳукумати 2013 йил 1 мартдан республика ҳудудига лазер таёқчаларини олиб кириш ва сотишни тақиқлаган. Бу ушбу қурилмаларнинг ноқонуний савдосига чек қўйиш, шунингдек парвозлар хавфсизлигини таъминлаш мақсадида қабул қилинган. Ҳуқуқни муҳофаза қилувчи органлар ўтган давр мобайнида бу борадаги 37 та қоидабузарликни аниқлаб, 1,5 мингдан ортиқ лазер таёқчаларини мусодара қилган.