Ўзбекистон автомобиль ва дарё транспорти агентлигида «Ўзбекистон Республикаси ички сув йўлларида фойдаланишда бўлган кемаларни рўйхатга олиш, кема реестрини юритиш, хос рақамларни ва кема гувоҳномасини беришнинг янги тартиби» мавзусида матбуот анжумани ўтказилди. Бу ҳақда агентликнинг расмий сайтида хабар берилди.

Анжуманда Агентликнинг Дарё кемачилиги регистри ва кемачилик инспексияси бош мутахассиси Валижон Азизов Ўзбекистон дарё кемачилиги, ушбу соҳани бошқариш ҳамда техник назорат қилиш органларининг қисқача тарихи; Ўзбекистон автомобиль ва дарё транспорти агентлиги Дарё кемачилиги регистри ва кемачилик инспексиясининг асосий вазифалари ва ҳуқуқлари; Республика дарё флотининг ҳозирги аҳволи, Мустақиллик йилларида ушбу соҳада амалга оширилган ишлар, ўзгаришлар; кемаларга ва сузиш воситаларига кема гувоҳномалари, классификация гувоҳномалари, сузишга яроқлилик тўғрисидаги гувоҳномалар ҳамда Регистр қоидаларида назарда тутилган бошқа ҳужжатларни бериш, кемаларни тегишли техник кўриклардан ўтказиш тартиби ҳамда Агентлик томонидан дарё транспорти соҳасида хавфсизликни таъминлаш мақсадида қабул қилинган меъёрий-ҳуқуқий ҳужжатлар ва уларга риоя этилишини назорат қилиш борасида бажарилаётган ишлар тўғрисида журналистларга батафсил маълумот берди.

«Хориждан, асосан, сайл қилишга, 8-35 нафар йўловчи ташишга мўлжалланган ўзиюрар кемалар, каналлар тубини чуқурлаштириш ва тозалаб туришга мўлжалланган земснарядлар олиб келинаётган бўлса, кейинги йилларда республикада мустақил равишда 400 тонна юк кўтариш қобилиятига эга бўлган ўзиюрмас кемалар қурилмоқда, – деди маърузачи. – Бундай кемалардан биттаси 2013 йилда ва биттаси 2014 йилда ‘Термиз дарё порти’ МЧЖ томонидан қурилиб, барча синовлардан муваффақиятли ўтди, уларга тегишли класс берилиб, кема ҳужжатлари расмийлаштирилгач, фойдаланишга рухсат этилди».