Дания пойтахти Копенгагенда полициячилар 14 февраль, шанба куни рўй берган терактларга алоқадорликда гумон қилинган шахсни отиб ташлади, дея хабар бермоқда «Ведомости».
Полициячилар Нерребродаги темир йўл станциясида шубҳали эркакни чақириб тўхтатган. Бунга жавобан у ўт очган ва жавоб ўқи билан отиб ташланган. Айни пайтда марҳумнинг қаҳвахона ва синагога (яҳудийлар ибодатхонаси)даги отишмаларга алоқаси ўрганилмоқда.
15 февраль, якшанбага ўтар кечаси Дания пойтахтидаги синагогалардан бирида номаълум киши ўт очди, натижада бир киши ҳалок бўлди, икки нафар полиция ходими яраланди. Бундан бир неча соат аввалроқ эса Krudttoenden қаҳвахонасига ҳужум уюштирилган эди. У ерда сўз эркинлиги масалаларига бағишланган мунозара иштирокчилари карикатурачи рассом Ларс Вилкс раҳбарлигида йиғилган эди. Вилкс 2007 йилда Муҳаммад (с.а.в.)пайғамбар карикатураларини чоп этгани учун террорчи айнан унга суиқасд қилмоқчи бўлгани тахмин этилмоқда. Шунингдек, учрашувда Франциянинг Даниядаги элчиси ҳам бўлган. Улар жабр кўрмаган, бироқ бошқа бир эркак ҳалок бўлган, уч нафар полициячи яраланган.
Изоҳ (0)