«Пахтакор» Туркиядаги назорат учрашувида «Газовик»ни мағлуб этди

Туркияда йиғин ўтказаётган «Пахтакор» 8 февраль кунидаги назорат баҳсида «Газовик»дан 2:1 ҳисобида устун келди, деб хабар бермоқда «Uff.uz».

Учрашувда ҳар икки жамоада тўп киритиш учун кўплаб имкониятлар юзага келди. Голлар иккинчи бўлимда урилди. Дастлаб Каримовнинг тўп оширишидан унумли фойдаланган Пардаев ҳисобни очди.

Иккинчи тўпда ҳам ҳужумни Каримов бошлаб берди. Кейин Андреевнинг зарбасини рақиб посбони қайтарди ва бундан Алимов фойдаланиб, орадаги фарқни оширди. Оренбурглик футболчилар кейинроқ ҳисобни қисқартирди.

Шу тариқа учрашувда «Пахтакор» 2:1 ҳисобида ғалаба қозонди.