29 январь куни муҳташам «Истиқлол» санъат саройида, Маданият ва спорт ишлари вазирлиги, «Ўзбекнаво» Эстрада бирлашмаси ҳамкорлигида, Ёшлар маданият ва санъат маркази томонидан «Йил қўшиғи−2014» гала концертига старт берилди, деб хабар бермоқда «Popcorn.uz».
Бу халқимиз юрагидан жой олган, қалбларни нозик туйғулар сари етаклаган, кимларнингдир дардига малҳам бўлиб, яна кимларнингдир бахтига қувонч ва шодлик улашган тароналар орасидан энг саралари тақдирланадиган кун, деб ёзади нашр.
Қолаверса, нафақат санъаткорлар, балки қўшиқ яратилишида иштрок этган учликнинг энг муҳим бўлаги ҳисобланган шоирлар-у, бастакорларнинг меҳнати ва ижоди рағбатлантирилди.
«Йил қўшиғи−2014» тақдирлаш маросими гала концерти аввалида, бутун инсоният қулоғига ўз она тилида чалинган илк қўшиқ, яъни «Алла»ни Умидахон Хўжаева маромига етказиб ижро этди. Сўнг Жасур Умиров томонидан аскарлик ҳаётини тасвирловчи қўшиқ янграр экан, таронага ҳамоҳангликда саҳна кўринишлари намойиш этиб борилди. Кетма-кет эстрадамиз юлдузлари иштирокида қўшиқлар янгради.
Сўнгра, ўзбек эстрадаси ва кинофильмлари учун яратилган ретро тароналар ёш истеъдод вакиллари ижросида тақдим этилиб мониторда «Маҳаллада дув-дув гап», «Мафтунингман», «Севишганлар» каби кинофильмлардан лавҳалар бериб борилди. Олтин бисотдан жой олган мазкур ўлмас санъат дурдоналари болажонлар ва ёш ижрочилар томонидан куйланди.
Ва ниҳоят, концертнинг асосий қисми бошланди, яъни ғолиб тароналарнинг ижрочилари, шоир ва бастакорлар учун «Йил қўшиғи−2014» мукофоти ҳамда махсус дипломи тақдим этилди.
2014 йил энг хит бўлган, қалбга яқин қўшиқлар ва уларнинг ижрочилари билан танишинг.
Илк ғолиб тарона «Афруз» гуруҳининг «Лола» қўшиғи, дея эълон қилинди. Матн муаллифи Элдор Қаюмов, бастакор Жасур Бадалбоев. Мукофотни эстрамизнинг ёрқин юлдузи Лола топширди.
Сўнгра Лола ва Dj Piligrim жуфтлигида янграган ва хит бўлган «Юлдуз» дуэти. Сўзлари Dj Piligrim, мусиқаси Жасур Бадалбоев. Мукофотни Ўзбекистон халк шоири Иқбол Мирзо топширди.
Сардор Мамадалиевнинг «Ажралишдик» қўшиғи, шоир Исмоил Тухташев, мусиқа муаллифи хонанданинг ўзи. Мукофотни Ўзбекистон халқ артисти Зулайҳо Бойҳонова тақдим этди ва миллий қўшиқ билан концертни давом эттирди.
Абдурашид Йўлдошевнинг «Ёнар кўзларинг» таронаси, Ботир Эргашев шеъри ва Мусахон Нурматов мусиқаси асосида яратилган. Ўзбекистон халқ артисти Ғуломжон Ёқубов муборакбод этиб сўнгра «Уйнаса» қўшиғини ижро этди.
Гуласал Абдуллаева «Так-тук» таронаси, матни Рислиғой Ҳотамова, мусиқаси Насиба Усмоновага тегишли. Мукофотни Адҳам Солиев топширди.
Улуғбек Раҳматуллаевнинг «Кабутарлар» қўшиғи, сўзи ва мусиқаси Алишер Тайрга тегишли. Мукофотни композитор Шуҳрат Зокиров топшириб, хонанданинг туғилган куни билан ҳам табриклашди. Совға сифатида Шуҳрат Зокиров «Бир кам дунё» мусиқасини жонли равишда роялда ижро этди. Машҳурбек ва Шаҳзода Муҳаммедовалар қўшиқ сўзларини ёдга келганича жонли ижро этишди. Саҳнадаги импровизацияга томошабинлар жўр бўлишди.
Умидахон Хўжаеванинг «Кел ярашайлик» хит таронаси, сўзи Элдор Қаюмов, мусиқа Жасур Бадалбоев. Шуҳрат Воҳидов мукофотлади.
Сардор Рахимҳон «Маликам энди кара» қўшиғи, Бобур Бобомурод шеъри, Аҳмаджон Ҳожиматов мусиқаси учун тақдирланишди. Сардор саҳнага бастакорни чақириб мукофотнинг асл эгаси у эканини айтиб, устозим, дея таништирди.
Муниса Ризаеванинг «Ёрим» таронаси, сўзи ва мусиқаси Элдор Қаюмовники. Мукофотни Ўзбекистон ҳамда Қоракалпоғистон халқ артисти Озодбек Назарбеков топширди ва «Ҳай, майли» қўшиғини ижро этди.
Мансурхон Нурматовнинг «Жамолинг зиёси» қўшиғи, шоир Азиз Жўрабоев, бастакор Азиз Ҳолмуродовлар тақдирланди. Хонанданинг ўзи маълум сабаблар билан ташриф буюролмагани учун мукофот шоир ва бастакорга топширилди.
Концерт сўнгида барча совриндорлар ижросида «Йил қўшиғи» гимни янгради.
29 январь куни номзодларнинг ўн нафарига мукофотлар тақдим этилган бўлса, 30 январда қолган яна ўнтаси ўз эгаларини топади.
Изоҳ (0)