Тошкент Ахборот технологиялари университетида кореяликлар иштирокида тренинг-семинар очилди

2015 йил 26 январь куни Тошкент Ахборот технологиялари университетида Тошкент ахборот технологиялари касб-ҳунар коллежи, Тошкент алоқа касб-ҳунар коллежи ва Қуйи Чирчиқ транспорт ва сервис касб-ҳунар коллежи талабалари учун «Android операцион тизими учун илова ишлаб чиқиш» мавзусида Корея миллий транспорт университети кўнгиллилари иштирокида ўқув тренинг-семинарнинг очилиш маросими бўлиб ўтди. Бу ҳақда Infocom.uz хабар бермоқда.

Очилиш маросимида ТАТУ ректори Х. Муҳитдинов, Корея делегацияси бошлиғи профессор Рюмдуcк Оҳ нутқи билан иштирок этди.

Android Google компанияси ишлаб чиққан мобил операцион тизими ҳисобланади. Бу смартфон ва мобил қурилмаларга очиқ платформа бўлиб, ўқув тренинг-семинар талабаларга янги билим, баъзиларга бу соҳадаги билимларини мустаҳкамлашга имкон беради. Ўқув семинари нафақат ТАТУ талабалари учун, балки ахборот ва телекоммуникацион технологиялар касб-ҳунар коллежлари талабалари учун ҳам долзарбдир.

Келишилган дастур бўйича ўқув тренинг-семинари 10 февралгача давом этади ва унда ТАТУ ҳамда 3 та коллеждан 40 нафар, КМТУдан 9 нафар талаба иштирок этади.

6 февраль куни ишлаб чиқилган дастурий маҳсулотлар ярмаркаси ташкил қилинади ва муваффақиятли қатнашган талабаларга сертификат ва совғалар топширилади.