Ўзбекистон Хотин-қизлар қўмитасида Ўзбекистон халқ шоири Зулфия таваллудининг 100 йиллигини нишонлашга тайёргарлик ва шоира ижодига бағишланган махсус веб-сайтни такомиллаштириш юзасидан йиғилиш бўлиб ўтди. Бу ҳақда Ўзбекистон Миллий ахборот агентлиги хабар бермоқда.
Ўзбекистон Ёзувчилар уюшмаси раисининг ўринбосари, халқ шоири Иқбол Мирзо, Ўзбекистон Касаба уюшмалари федерацияси кенгаши раиси Т. Норбоева ва бошқалар Президент Ислом Каримов раҳнамолигида амалга оширилаётган кенг кўламли маънавий-маърифий ислоҳотлар жараёнида Ўзбекистон миллий адабиётида ёрқин из қолдирган ижодкорларнинг ҳаёти ва бой меросини ўрганишга қаратилаётган доимий эътибор халқ, жумладан, ёш авлод маънавиятини юксалтиришда муҳим омил бўлаётганини таъкидлади.
Давлат раҳбарининг 2014 йил 31 октябрдаги «Ўзбекистон халқ шоири Зулфия таваллудининг 100 йиллигини нишонлаш тўғрисида»ги қарори бу борадаги ишлар кўламини кенгайтиришда дастуриламал бўлмоқда.
Айни пайтда Ўзбекистонда тегишли давлат, жамоат ва ижодий ташкилотлар ҳамкорлигида қарорда белгиланган вазифаларни ҳаётга татбиқ этиш юзасидан кенг қамровли ишлар олиб борилмоқда. Хусусан, шоиранинг «Сайланма» асарлари, «Зулфия замондошлари хотирасида» китоби ва бошқа асарлар нашрга тайёрланмоқда. Олий ва ўрта махсус, касб-ҳунар, умумтаълим муассасалари, ҳарбий қисмлар, меҳнат жамоалари, маҳаллаларда таниқли адиб ва шоирлар, фан ва маданият намояндалари иштирокида шоиранинг ҳаёти ва ижодига бағишланган туркум учрашувлар, адабий кечалар ўтказилмоқда.
Ўзбекистон Хотин-қизлар қўмитаси томонидан ҳам қатор ташкилотлар билан ҳамкорликда юбилейни юқори савияда ўтказиш бўйича муайян лойиҳалар амалга оширилмоқда. Жойларда уюштирилаётган маънавий-маърифий тадбирларга аҳоли ва ёшлар кенг жалб этилмоқда.
Зулфиянинг серқирра фаолияти ва адабий меросини ёшлар ўртасида кенг тарғиб қилиш мақсадида «Саодат» журнали қошида махсус ижодий мактаб ташкил этилди. Ўзбекистондаги қатор театрларда шоиранинг «Хотирам синиқлари» достони асосида саҳналаштирилган спектакл намойиш қилинмоқда.
Шоира ҳаёти ва ижодига бағишланган «Zulfiyaxonim.uz» сайтини такомиллаштириш юзасидан ҳам изчил ишлар бажарилмоқда. Ушбу сайтда шоиранинг ҳаёт ва ижод йўли, унинг сиймоси акс этган сурат ва ҳайкалтарошлик намуналари, фотоальбомлар, аудио ва видеофайллар, рассомларнинг Зулфия китобларига ишлаган иллюстрациялари, қардош халқлар адибларининг шоирага бағишланган асарлари, мустақиллик даврида Президент раҳнамолигида истеъдодли ижодкорга кўрсатилган юксак эҳтиром, Зулфия номидаги Давлат мукофоти совриндорларининг фаолияти ифода этилган маълумотларни ўқувчиларга тақдим этиш режалаштирилган.
Тадбирда юбилейга тайёргарлик, шоиранинг ҳаёти ва ижоди ҳақида ҳикоя қилувчи сайтни яратишда турли ташкилотлар ҳамкорлигида олиб борилаётган ишларни янада такомиллаштириш бўйича вазифалар белгиланди.
Йиғилишда Ўзбекистон Республикаси Бош вазирининг ўринбосари, Республика Хотин-қизлар қўмитаси раиси Э. Боситхонова сўзга чиқди.
Изоҳ (0)