Ўзбекистонда халқаро ахборот тармоқларидан фойдаланиш умумий тезлиги 62 фоизга ўсиб, бугунги кунда 16 640 Мбит/с ни ташкил қилмоқда. Бу ҳақда Алоқа, ахборотлаштириш ва телекоммуникация технологиялари давлат қўмитаси Ҳайъатининг 2014 йилда ахборот-коммуникация технологияларини жорий қилиш бўйича амалга оширилган ишлар сарҳисоби, истиқболдаги вазифаларга бағишланган мажлисида қайд этилди.
Қайд этилишича, Ягона интерактив давлат хизматлари портали ҳам юқори суръатларда ривожланиб бормоқда. Ўтган вақт мобайнида фуқаролар ва тадбиркорларга умумий ҳолатда 110 мингдан ортиқ электрон хизмат кўрсатилди. Бугунги кунда портал орқали 230 та интерактив хизмат кўрсатиляпти.
2014 йил Ягона портал орқали тадбиркорлик субъектларига 45,6 минг электрон хизмат кўрсатилди. Қайд этилишича, 7000 дан ортиқ тадбиркорлик субъектлари портал орқали электрон шаклда рўйхатдан ўтган, 400 бор фуқаролар давлат органлари раҳбарлари қабулига интернет орқали ёзилган.
Давлат идораларида ҳимояланган электрон почта тизими Е-ХАТ орқали 485 мингдан зиёд электрон хат алмашилган. Электрон рақамли имзо калитларидан фойдаланаётганлар сони 720 мингдан ошди (ўсиш олдинги йилнинг шу даврига нисбатан 2 баробарни ташкил қилади).
Давлат органлари веб-сайтлари ҳамда электрон ресурслари орқали 650 турдаги интерактив хизматлар кўрсатилмоқда. Бугунги кунда аҳоли ва тадбиркорлик субъектларига электрон хизматлар кўрсатишнинг муҳим омили ҳисобланган давлат ахборот ресурслари сони 226 та, давлат органлари ахборот тизимлари сони 297 тага етган.
Изоҳ (0)