Андижон вилоятида туғилган киши 30 ёшга кирмасдан иккинчи марта Тошкент шаҳар Яккасарой туман жиноят ишлари бўйича суди томонидан 12 йилга озодликдан маҳрум этилган эди, деб хабар бермоқда «На посту» газетаси.
Тўрт йил ўтгач амнистияга тушгач, Навоий вилоятидаги туман жиноят ишлари бўйича суди унинг озодликдан маҳрум қилиниш жазосининг қолган муддатини маошининг 30 фоизини давлат ҳисобига ўтказиш шарти билан ахлоқ тузатиш ишларига алмаштирди. Тўрт фарзанднинг отаси бўлган бу шахс Андижон шаҳридаги кўп қаватли уйлар қурилишига ишга кирди. Бироқ ахлоқ тузатиш ишлари бошланганидан бир неча ой ўтиб, иш унга оғир ва истиқболсиз туюлиб, киракашлик қилиш учун танишидан енгил автомобилни ижарага олди.
Шу тариқа у мижоз олиб, Тошкентга келди. Пойтахтда эса ўзининг эски танишларидан икки нафарини учратиб қолди. Улар ўзаро суҳбатлашиб туриб, яқинда Lacetti ва Damas тўхтаганини, Lacetti эгаси Damas’га иккита пакет узатганини, кейин эса иккаласи ҳам ўз иши билан кетганини кўриб қолди. Пакетларда катта миқдорда пул борлигини пайқаган эски қадрдонлар Damas’нинг орқасидан тушди.
Автомобиль Чилонзор туманидаги қаҳвахона олдида тўхтаб, унинг хўжайини ичкарига кирганини кўрган жиноятчилар Damas’ни очиб, ичидаги пул тўлдирилган пакетларни олишди. Бироқ йўлда уларнинг биридаги пакет йиртилиб, пул сочилиб кетди. Шу пайтда қаҳвахонадан чиққан Damas эгаси бошқа гувоҳлар билан бирга уни ушлаб қолишга муваффақ бўлди. Қутилиб қолган икки шерик эса иккинчи пакетдаги тўрт миллион сўмни тенг бўлиб, қочиб кетди.
Уни излашларини билган андижонлик эркак уйига қайтди ва ўмарган пуллари ҳисобига бир муддат яшади. Улар тугагач ҳам ишга жойлашмади, иккита ишда ишлайдиган хотини ҳисобига яшаб турди. Кейин эса яна осон бойиш мақсадида пойтахтга йўл олди. Тошкентда бозор яқинида жойлашган турли вилоятлардан келган тадбиркорлар тўхтаган автотураргоҳда кун бўйи автомобилларни кузатди.
Ниҳоят давлат рақами Қашқадарё вилоятига тегишлилигини билдириб турувчи Nexia эгасининг телефонда ким биландир катта пул ҳақида гаплашаётганини эшитиб қолди ва хўжайин автомбилдан узоқлашгач машинани очиб, бирида 6 минг, бирида 19 минг доллар бўлган икки пакетни топди. 25 минг долларни чўнтакка уриб, воқеа жойидан ғойиб бўлади.
Табиийки, жабрланувчи воқеа юзасидан ҳуқуқни муҳофаза қилувчи органларга мурожаат қилди. Ички ишлар ходимлари тез орада ушбу жиноятни очишга муваффақ бўлди. Тергов жараёнида жиноятчи ва унинг шерикларининг бошқа қилмишлари ҳам ошкор бўлди. Бу қилмишлар учун улар қонун олдида жавоб бердилар.
Изоҳ (0)