Ҳиндистонда машина жарга қулаши оқибатида 11 киши ҳалок бўлди
24 январга ўтар кечаси Ҳиндистоннинг Аруначал Прадеш штати шимоли-шарқий қисмида машинанинг дарага қулаши оқибатида камида 11 киши ҳалок бўлди, 3 киши жиддий жароҳатланди. Бу ҳақда ТАСС хабар беради.
Полиция маълумотига кўра, фожиа тоғ йўлининг мураккаб қисмида йўлнинг яхши кўринмаслиги натижасида содир бўлган.
Қалин туман сабабли бурилиш нуқтасида ҳайдовчи машинани бошқара олмай қолган ва машина йўл четига чиқиб кетган. Шимолий Каменг туманига кетиш йўлида, Сесса шаҳри яқинида машина 45 метр баландликдан дарага қулаган.
Воқеа тўғрисида ҳукуматга маҳаллий аҳоли маълум қилган. Қутқарув ишлари тонгга яқин бошланиб, полиция воқеа жойида ҳалок бўлган 10 кишининг жасадини топди. Яна бири касалхонага олиб кетилаётганда вафот этди, қолган учтаси оғир жароҳат билан касалхонага ётқизилди. Машинада бўлганлиги тахмин қилинаётган яна икки киши қидирилмоқда.
