Тошкентнинг «Пахтакор» клуби мавсумга тайёргарлик йиғинида илк бор мағлубиятга учради

«Пахтакор» Туркия йиғинида иккинчи назорат ўйинини ўтказди, деб хабар беради «Stadion.uz».

Анталияда Саранскнинг «Мордовия» клубига қарши майдонга тушган «шерлар» 1:3 ҳисобида имкониятни бой берди. Учрашувни шиддатли ҳужумлар билан бошлаган рақиб тез орада икки тўп киритди. Шундан кейин ташаббусга эришган «Пахтакор» биринчи бўлимда вазиятлардан фойдалана олмади.

Иккинчи бўлим бошида захирадан туширилган Раҳматуллаев аниқ зарбаси билан фарқни қисқартирди. Бироқ 71-дақиқада «Мордовия» Самодиннинг зарбасидан кейин яна 2 тўп фарқини тиклади. Ушбу натижа ўйин охиригача ўзгармади. «Пахтакор» мавсумга тайёргарлик йиғинида биринчи бор мағлубиятга учради.

«Пахтакор» — «Мордовия»: 1:3

Голлар: Луценко (11), Власов (13), Раҳматуллаев (49), Самодин (71).

«Пахтакор»: Рибкин, Мерзляков, Тожиев, Ораховац, Ҳошимов, Махарадзе (Андреев, 57), Исматуллаев, Андреев (Машарипов, 15), Козак (Соҳибов, 57), Каримов (Раҳматуллаев, 47), Пардаев (Алимов, 52).