Хамес Родригеснинг голи 2014 йилда урилган энг чиройли гол деб топилди

Колумбия терма жамоаси ҳамда «Реал» клуби ҳужумкор ярим ҳимоячиси Хамес Родригеснинг голи ФИФА томонидан 2014 йилнинг энг яхши голи деб топилди. Хамесга венгриялик афсонавий ҳужумчи Ференс Пушкаш номидаги соврин топширилди, деб хабар бермоқда «Olamsport».

Родригес ушбу голини 28 июнь куни ЖЧ-2014 доирасидаги Уругвай терма жамоасига қарши кечган ўйинда киритганди. Шунингдек, ушбу совринга Робин ван Перси («Манчестер Юнайтед») ва Стефани Роч («Пимаунт Юнайтед», Ирландия) даъвогарлик қилганди.

Йилнинг энг яхши голини мухлислар аниқлаб беришди. Ушбу сўровда жами 3,3 миллион мухлис иштирок этди. Хамес Родригеснинг голи 42 фоиз овоз тўплади. Иккинчи ўринни Роч (33%) эгаллаган бўлса, кучли учликка ван Перси (11%)нинг аниқ зарбаси якун ясади.