Фидель Кастронинг жияни унинг ўлими ҳақидаги хабарларни рад этди

Фидель Кастронинг жияни Алехандро Кастро Эспин Куба инқилоби етакчисининг ўлими ҳақидаги миш-мишларни рад этди, деб хабар бермоқда «Российская газета».

Кубанинг ҳозирги етакчиси Раул Кастронинг ўғлининг сўзларига кўра, Фидель Кастро ўзини яхши ҳис қилмоқда. Ҳозирда Грецияда бўлиб турган Алехандро Кастро  амакисини охирги марта икки кун олдин кўрганини маълум қилган ва унинг саломатлиги ҳақидаги миш-мишларга эътибор бермасликни сўраган.

Қайд этилишича, сўнгги кунларда интернетда Фидель Кастро вафот этгани ҳақида хабарлар тарқалиб кетган. Ғарбнинг баъзи нашрлари ҳаттоки Венесуэладаги кубалик ҳарбийлар оммавий равишда мамлакатга қайтаётганини, режалаштирилмаган матбуот анжумани ўтказилишини ва Раул Кастронинг чиқиш қилиши эҳтимоли борлигини маълум қилган.