Ўзбекистонда нотариуслар мурожаатларни навбат билан қабул қиладиган бўлди
Жисмоний ва юридик шахслар бевосита келиб ёки телефон орқали, ёзма ёхуд электрон шаклда, шу жумладан Ягона интерактив давлат хизматлари портали орқали ўзлари учун қулай ва аниқ вақтда нотариус томонидан қабул қилинишни сўраб мурожаат қилиш ҳуқуқига эга бўлди. Бу ҳақда «Газета.uz» хабар берди.
Бу Адлия вазирлигининг Давлат нотариал идораларида жисмоний ва юридик шахсларнинг мурожаатларини навбатма-навбат қайд этиш тартиби тўғрисидаги низом (pdf)да кўзда тутилган.
Ушбу ҳужжат Давлат нотариал идораларида жисмоний ва юридик шахсларга ҳуқуқий хизмат кўрсатиш сифатини янада ошириш ва уларга қулайлик яратиш мақсадида қабул қилинди.
Мурожаатлар белгиланган шаклда юритиладиган Нотариал ҳаракатларни амалга ошириш ҳақидаги мурожаатларни навбатма-навбат қайд этиш дафтарига қайд қилинади.
Давлат нотариал идорасида фаолият юритадиган нотариуслар сонидан қатъий назар, ҳар бир давлат нотариал идорасида ягона дафтар юритилади. Бунда келиб тушган мурожаатлар нотариусларнинг иш кунлари ва вақтини ҳисобга олган ҳолда ҳар бир нотариусга тенг тақсимлаб берилади.
