Самарқанд вилоятида 16 гектарли Камонгарон сув омбори ишга тушди
Самарқанд вилоятининг Ургут туманида Камонгарон сув омбори қурилиши ишлари якунланди, деб хабар беради Ўзбекистон Миллий ахборот агентлиги.
16 гектар майдонни эгаллаган мазкур сув омбори Камонгарон сойи, булоқ ва сел сувларидан тўпланиб, 1,5 миллион куб метргача оби ҳаётни ташкил этади. Иншоотда тўпланаётган сув миқдори ва таркибини аниқлаш, уни тақсимлаш учун замонавий ускуналар ўрнатилган.
«Ушбу сув омбори тумандаги 100 гектарга яқин ерни сув билан таъминлаш, мелиоратив ҳолатини яхшилашга хизмат қилади, — деди «Ўзмахсуссувқурилиш ихтисослашган компания»си давлат корхонаси директори Қаҳрамон Фатиллаев. — Камонгарон ва Вағашти қишлоқлари аҳолиси ва фермер хўжаликларининг сувга бўлган эҳтиёжини тўла қондиради».
Туман қишлоқ хўжалигида сувдан самарали фойдаланиш ҳамда сув таъминотини яхшилаш мақсадида амалга оширилган мазкур лойиҳа учун 17 миллиард 884 миллион сўмдан зиёд маблағ сарфланди.
