Ўзбекистон Президенти Ислом Каримов сайловда овоз берди

Ўзбекистонда 2014 йил 21 декабрь куни Олий Мажлис Қонунчилик палатаси ҳамда халқ депутатлари вилоят, туман ва шаҳар Кенгашларига сайловлар бўлиб ўтмоқда, деб хабар беради Ўзбекистон Миллий ахборот агентлиги.

Ўзбекистон Республикаси Президенти Ислом Каримов 21 декабрь куни овоз бериш учун Олий Мажлис Қонунчилик палатаси ҳамда Тошкент шаҳар Кенгашига сайлов ўтказувчи 644-сайлов участкасига ташриф буюрди.

Мустақиллик йилларида Ўзбекистонда Конституция билан кафолатланган сайлов тизими яратилди. Бу тизим изчил такомиллаштириб борилмоқда.

Хусусан, сайлов якунларига кўра парламентда энг кўп депутатлик ўрнини олган сиёсий партия томонидан Ўзбекистон Республикаси Бош вазири номзоди таклиф этилиши тамойили ҳамда ҳукуматга нисбатан ишончсизлик вотуми институтининг жорий этилиши ўз мазмун-моҳияти билан Ўзбекистонни ислоҳ этиш ва демократлаштиришнинг янги босқичини бошлаб берди.