БМТ Тараққиёт Дастури билан ҳамкорликда Қамчиқ довонида табиий офатлар хавфини камайтириш лойиҳаси амалга оширилмоқда
Фавқулодда вазиятлар вазирлиги ҳамда БМТ Тараққиёт Дастури ҳамкорлигида амалга оширилаётган «Табиий офатлар хавф-хатарини бошқариш бўйича Ўзбекистон Республикасининг салоҳиятини мустаҳкамлаш» лойиҳаси доирасида «Қамчиқ довони йўлида табиий офатлар хавфини камайтириш» янги йўналиши амалга оширилмоқда. Бу ҳақда БМТ Тараққиёт Дастурининг Ўзбекистондаги ваколатхонаси матбуот маркази хабар берди.
Ушбу тадбирлар Европа Ҳамжамиятининг Гуманитар Ёрдам бериш Департаменти (ECHO) ҳамда БМТ Тараққиёт Дастурининг Ўзбекистондаги ваколатхонаси молиявий кўмагида амалга оширилмоқда.
Кўзланган тадбирларнинг асосий мақсади табиий офатлар юз бериши мумкин бўлган Қамчиқ довони атрофидаги ҳудудларда яшовчи аҳолини фавқулодда ҳолатларга тайёргарлигини ошириш мақсадида ушбу Қамчиқ довонида хатарли гидрологик ҳолатларни кузатиш учун мониторинг тизимини ўрнатишдир.
Ўзбекистон иқтисодиёти учун муҳим йўналиш бўлган Қамчиқ довони Ўзбекистоннинг марказий шаҳри ва аҳоли энг кўп яшайдиган Фарғона водийси – Наманган, Андижон ва Фарғона вилоятларини боғлаб турувчи юк ташувчи ва йўловчи транспорт йўналиши бўлиб, бу йўлдан кунига 10-15 мингга яқин транспортлар воситалари ўтади.
Белгиланган тадбирлар доирасида хавфли гидрометеорологик ҳолатларни кузатиш тизимини такомиллаштириш, фавқулодда ҳодиса юз берган жойини аниқлаш хусусиятига эга мобил телефонлар учун янги дастур, ФВВнинг янги веб-сайти ҳамда янги йўналишнинг муҳим ҳудуди бўлган Оҳангарон шаҳрида қор кўчиши, ер кўчкиси ва сел келиши ҳақида аҳолининг хабардорлигини ошириш мақсадида бир қатор медиа материалларини: ўқув фильми, болалар учун мултипликацион фильм, брошюра ва қўлланмалар ишлаб чиқиш мўлжалланган.
