АҚШ Давлат департаменти Россияга нисбатан янги санкциялар киритилгани ҳақида нотўғри маълумот бериб юборди
АҚШ Давлат Департаменти расмий сайтида келтирилган муассасанинг расмий вакили Жен Псакининг брифингдаги гаплари стенограммасида Барак Обама Россияга қарши санкциялар киритиш тўғрисидаги янги қонун лойиҳасини 16 декабрь куни имзолагани ҳақида маълумот пайдо бўлди, деб хабар бермоқда «РБК».
17 декабрь куни ўтказилган брифинг стенограммасида тегишли саволга Псаки «У буни кеча имзолади» деб жавоб бергани келтирилган. Брифинг видеоёзуви кўрилганда эса Псаки аслида бундай демагани маълум бўлган. Бир неча соатдан кейин юқоридаги жумла ёнига Обама ҳали ҳужжатни имзоламаганига аниқлик киритиб ўтилган.
Қайд этилишича, Оқ уй сайтидаги «қонун лойиҳалари» бўлимида ушбу ҳужжат президент имзолаши кутилаётган қонунлар орасида кўрсатилган. Аввалроқ, Оқ уй расмий вакили Жош Эрнст Обама ушбу қонунни жорий ҳафта охиригача имзолаши мумкинлигини маълум қилган эди.
