«Ўзбеккино» Миллий агентлиги қошидаги бадиий кенгаш Ўзбекистон халқ шоири Зулфия таваллудининг 100 йиллиги олдидан унинг ҳаёти ва ижодига бағишланган «Безавол дунё» ҳужжатли фильмини тасвирга олиш ҳақида қарор қабул қилди, деб хабар бермоқда «Ўзбеккино» Миллий агентлигининг матбуот хизмати.
Илмий-оммабоп ва ҳужжатли фильмлар сценарийларини тайёрлаш бўлими бош муҳаррири Комилжон Шамсиддиновнинг маълум қилишича, яқин кунларда Илмий-оммабоп ва ҳужжатли фильмлар киностудиясида ушбу ҳужжатли фильмни ишлаб чиқаришга киришилади.
Эслатиб ўтамиз, Ўзбекистон Республикаси Президентининг 2014 йил 31 октябрдаги «Ўзбекистон халқ шоири Зулфия таваллудининг 100 йиллигини нишонлаш тўғрисида»ги қарорида «шоиранинг ҳаёти ва ижодий фаолияти ҳақида ҳужжатли фильм яратиш» вазифаси белгиланган эди.
Комилжон Шамсиддиновнинг қайд этишича, айни пайтда Илмий-оммабоп ва ҳужжатли фильмлар киностудиясида «Ўзбеккино» Миллий агентлиги буюртмасига кўра, «Ўғлонлар», «Гирдоб», «Қадриятлар қадрланган юрт» ва бошқа яна бир қанча ҳужжатли фильмлар устида ҳам иш олиб борилмоқда.
Изоҳ (0)