Сидней полицияси қаҳвахонани гаровга олган жиноятчи йўқ қилинганини тасдиқлади

Австралия полицияси Сидней шаҳридаги Lindt шоколад фабрикасига тегишли қаҳвахона ходимлари ва мижозларини асирга олган босқинчи йўқ қилинганини тасдиқлади, деб хабар бермоқда «Gazeta.ru».

Полиция маълумотларига кўра, қаҳвахонани эгаллаб олган босқинчи − 50 ёшли Харом Монис, шунингдек 38 ёшли аёл ва 34 ёшли эркак ҳалок бўлган. Яна икки киши ҳаёт учун хавфли бўлмаган жароҳатлар билан шифохонага ётқизилган, бир нафар полициячининг юзига ўқ теккан.

Эслатиб ўтамиз, босқинчи 30 га яқин кишини қаҳвахонада 16 соатга яқин асирликда ушлаб турди. Баланд портлаш овозидан кейин бир неча асир у ердан қочиб чиққач, ҳужум операцияси бошланган. Кейин яна бир неча марта портлаш овози эшитилган.