«Урганч» халқаро аэропортида янги терминал ишга туширилди

2014 йил 15 декабрь куни «Урганч» халқаро аэропортида соатига 300 йўловчига хизмат кўрсата оладиган янги терминал ишга туширилди, деб хабар бермоқда «Туркистон-пресс» нодавлат ахборот агентлиги.

Ўзбекистон миллий авиакомпанияси вакиллари маълум қилишича, бу минтақанинг сайёҳлик салоҳияти ошишига имкон беради. Бинода авиация хавфсизлигини юқори даражасини таъминлаш учун замонавий муҳандислик ва технология ускуналари ўрнатилган. Янги терминалда маҳаллий ва халқаро  йўналишлар йўловчилари учун заллар, шунингдек CIP-зал бўлиб, уларнинг ҳар бирида валюта айирбошлаш шохобчалари ҳамда оналар ва болалар хоналари мавжуд. Шунингдек, терминалда тиббиёт хонаси, Duty-free, қаҳвахона ва бошқа қулайликлар ҳам бор.

Эслатиб ўтамиз, жорий йилнинг май ойида «Урганч» халқаро аэропортида учиб келувчи йўловчилар учун янги терминал фойдаланишга топширилган эди. Бу ишлар Ўзбекистон Президентининг «2013−2015 йилларда Хоразм вилоятида туризм соҳасини ривожлантириш дастури тўғрисидаги» қарори ижроси юзасидан олиб борилмоқда.

Янги терминалнинг тантанали очилиш маросимида Хоразм вилояти ҳокими П. Бобожонов, «93-Махсустрест» пудрат ташкилоти бош директори Р. Нормурадов, «Урганч» халқаро аэропорти ходимлари ва оммавий ахборот воситалари вакиллари иштирок этди.