Россиядаги кўл тубидан метеорит топилди
Карелиядаги Вигозеро кўли тубидан метеорит топилди. Бу ҳақда «Космопоиск» тадқиқот ҳамжамияти раҳбари Вадим Чернобровга асосланиб «Российская газета» хабар бермоқда.
Экспедиция 1 декабрь куни уюштирилган. Қайд этилишича, метеорит муздан иборат. Метеорит тушган ҳудудда радиация даражаси ошган. Экспедиция иштирокчилари тушган космик объектдан, шунингдек атрофдаги муз ва тупроқдан намуналар олган.
Аввалроқ 1 декабрь куни маҳаллий вақт билан соат 8 да Карелиянинг Сегеж районидаги Вигозеро кўлига номаълум жисм тушиб, қирғоқнинг бир қисмини ўпиргани ва музда диаметри тўрт метрлик туйнук очгани хабар берилган. Маҳаллий балиқчиларнинг бу ҳақидаги хабаридан сўнг етиб келган фавқулодда вазиятлар вазирлиги ходимлари кўл тубидан ҳеч нима топа олмагач, бу ерга «Космопоиск» экспедицияси жўнатилган.
