Австралиялик рассом Питер Лик дунёдаги энг қимматбаҳо фотосуратчига айланди. Исми номаълумлигича қолишини истаган лос-анжелеслик коллекционер Мельбурнда яшовчи бу рассомнинг «Фантом» деб номланувчи суратини 6,5 миллион долларга сотиб олди, деб хабар беради «Кун» «Вести.ru»га таяниб.
Фотосурат АҚШнинг жануби-ғарбида жойлашган Антилопа номли сунъий узун водийда суратга олинган.
Бу фотосуратда тешикдан ғорга тушаётган нур акс эттирилган. Нур худди шарпага ўхшаб кўринади, шунинг учун ҳам бу суратга «Фантом» («Шарпа») деб ном берилган. Аввалроқ австралиялик фотосуратчи ўзининг ушбу америкалик ихлосмандига «Иллюзия» суратини 2,4 миллион доллар ва «Абадий кайфиятлар» суратини 1,1 миллион долларга сотган эди.
Бунгача дунёда энг қимматбаҳо фотосурат сифатида Андреас Гурски ижодига тегишли «Рейн II» фотопортрети қайд этилганди. Бу фотосурат 2011 йилда 4,3 миллион долларга сотилган.
Маълумот учун, Питер Лик 1959 йил Мельбурнда дунёга келган. 30 йилдан бери фотосуратчилик билан профессионал даражада шуғулланиб келади. Турли халқаро мутахассислар унинг ишларини юқори баҳолаган.
Изоҳ (0)