ЎФФ Ўзбекистон миллий терма жамоасининг ўртоқлик ўйинлари ўтказилмай қолганини тасдиқлади
Ўзбекистон Футбол Федерацияси Twitter’даги расмий саҳифаси орқали Дубайда йиғин ўтказаётган Ўзбекистон миллий терма жамоасининг Қувайт ва «Ал Шааб»га қарши кечиши лозим бўлган ўйинлари ўтказилмай қолганини расман тасдиқлади, деб хабар беради «Uff.uz».
Бироқ федерация бунинг сабабини маълум қилишдан бош тортган ва фақат Дубайдаги делегация раҳбарлари хабар бергачгина, бунинг имкони бўлишини маълум қилган.
«ЎФФ миллий терма жамоанинг Қувайт ва кейинроқ ‘Ал Шааб’ клубига қарши назорат учрашувлари ўтказилмаганини тасдиқлайди. Дубайдаги миллий терма жамоа раҳбариятидан ўйинлар ўтказилмай қолганининг сабаблари ҳақида хабар келмагунича вазиятга изоҳ берилмайди», — дейилади ЎФФ томонидан берилган хабарда.
Эслатиб ўтамиз, режага кўра Ўзбекистон МТЖ 10 декабрда Қувайт билан ўртоқлик ўйини ўтказиши лозим эди. Аммо Қувайт томони ўйиндан бош тортгач, «Ал Шааб» билан келишувга эришилгани хабар қилинганди. Аммо араб клуби ҳам Ўзбекистон миллий терма жамоаси билан куч синашни истамади.
