Форс кўрфази давлатлари умумий армия ва полиция ташкил қилмоқчи

Форс кўрфази давлатлари умумий армия ва Интерпол тамойиллари бўйича террорчилик, «пул ювиш», гиёҳванд моддалар савдоси ва кибержиноятларга қарши курашувчи умумий полиция ташкил қилмоқчи, деб хабар бермоқда Euronews.

Тегишли келишувга Қатарда бўлиб ўтган Форс кўрфази араб давлатлари ҳамкорлиги кенгашининг навбатдаги саммитида эришилган. Шунингдек, саммитда аввал Мисрнинг «Мусулмон биродарлар» партияси тарафида бўлган Қатар энди Қоҳирадаги ҳозирги ҳукуматни қўллашини билдирди.

Қайд этилишича, бир ой олдин Доҳани «Мусулмон биродарлар»га кўмак бераётганликда айблаган Саудия Арабистони, БАА ва Баҳрайн Қатардаги ўз элчиларини чақириб олган. Саудия Арабистони ушбу партияни террорчилик ташкилоти деб ҳисоблаши айтилган.