Ўзбекистон Республикаси Вазирлар Маҳкамасининг топшириғига асосан «Ёшлар» телерадиоканалида «Тадбиркор даври» кўрсатуви ташкил этилди. Бу ҳақда Ўзбекистон Матбуот ва ахборот агентлиги хабар бермоқда.

Тадбиркорлик фаолиятини тартибга солувчи қонунчилик нормаларининг мазмун-моҳиятини аҳоли, энг аввало, тадбиркорлик субъектлари ўртасида кенг тушунтириш, амалга оширилаётган ислоҳотлар тарғиботининг самарадорлигини ошириш мақсадида Ўзбекистон Миллий телерадиокомпанияси «Ёшлар» телеканалида «Тадбиркорлар даври» номли доимий фаолият юритувчи таҳририят ташкил этилди.

Тадбиркорлик фаолиятини ташкил этиш ва юритиш билан боғлиқ бўлган тартиботлар ҳақидаги интерфаол телекўрсатувлар циклини ташкил этиш мазкур таҳририятнинг асосий вазифаси ҳисобланади.

Кўрсатувнинг дастлабки сони жорий йилнинг 4 декабрь куни соат 20:10 да ҳамда такроран 5 декабрь куни соат 14:00 да эфирга узатилиб, тадбиркорлик субъектларини давлат рўйхатидан ўтказиш билан боғлиқ тартиботларга бағишланади.

Кўрсатувнинг кейинги сонларида бизнес-режа ва инвестиция лойиҳалари бўйича лойиҳа ҳужжатларини тайёрлаш, тижорат банкларида кредит олиш, ер участкалари бериш ва қурилишга рухсатномаларни расмийлаштириш, мулкка ҳуқуқни рўйхатдан ўтказиш, муҳандислик-коммуникация тармоқларига уланиш ва шу каби тадбиркорлик фаолиятини амалга ошириш билан боғлиқ долзарб саволларни ёритиб бориш кўзда тутилган.

Биринчи босқичда мазкур кўрсатув «Ёшлар» телеканалининг кечки эфирида ҳафтасига бир маротаба (эртаси куни ва келаси ҳафта такроран) намойиш этилиши кўзда тутилган.