Простата бези саратони ташхиси қўйилган Танзания президенти Жакая Киквете соғайганини эълон қилди, дея хабар бермоқда ТАСС.
Ноябрь бошида у АҚШнинг Мэриленд штати Балтимор шаҳридаги Жон Хопкинс касалхонасида муваффақиятли операция қилинди.
«2013 йил сентябрида менга простата саратони ташхисини қўйишган эди, бироқ ҳозир мен соппа-соғман», — дея баёнот берди у ватанига қайтгач.
64 ёшли Киквете шифокорлар унга соғайганини айтганини маълум қилди ва ўзини яхши ҳис қилаётганини таъкидлади.
Жакая Киквете Шарқий Африканинг Танзания давлати раҳбарлигига 2005 йилда сайланган, унинг иккинчи ва сўнгги президентлик муддати 2015 йил октябрида тугайди.