Хакерлар Forbes, Ferrari, The Telegraph, The Independent, Al Jazeera, PC World каби нашрларнинг сайтларига ҳужум уюштиришди. Бу ҳақда Webrazzi нашрига таяниб, «Кун» хабар беради.
Нашрнинг таъкидлашича, ҳужумлар «Сурия электрон армия»си томонидан амалга оширилган. Тахмин қилинишича, хакерлар фойдаланувчиларга ижтимоий тармоқларда рўйхатдан ўтишда кўмак берувчи Gigya хизматини бузиб киришнинг уддасидан чиққан. Бунинг ортидан бу хизмат билан ишловчи дунёнинг етакчи нашрлари сайтлари ҳам ҳужумга учради. Бу сайтларга кирган фойдаланувчилар унда «Сиз Сурия электрон армияси томонидан очилдингиз» деган ёзувнинг гувоҳи бўлди ёки бу ташкилотнинг герби тасвирланган саҳифага йўналтирилди.
Gigya хизмати ушбу ҳужум юзасидан ҳеч қандай шарҳ бермади. Ҳозирда нашрларнинг сайтлари одатдаги тартибда ишламоқда.