Интернетда UMS мобил алоқа операторининг расман тасдиқланмаган «Старт» ва «Maxi» тариф режалари ҳақида маълумот пайдо бўлди. Уларни қуйида Beeline ва Ucell мобил алоқа операторларининг тариф режалари билан таққослаймиз.
Изланишлар натижасида UMS мобил алоқа операторининг «Старт» тариф режаси Beeline’нинг «Оддий» ва «Браво Ооо» ҳамда Ucell’нинг «Оддий» ва «Кўпроқ» тариф режалари билан ўхшаш эканлиги аниқланди.UMS'нинг «Старт» тариф режасини таққослаймиз
UMS’нинг «Старт» тариф режасида кунлик абонент тўлови Ucell’дагидан 2,5 баробар, Beeline’дагидан эса 1,5 баробар қиммат. Ўзбекистон бўйича SMS жўнатиш ва тармоқ ичида чиқувчи қўнғироқлар учун тўлов миқдори ҳам UMS’да бошқа алоқа операторларига нисабатан бир сентга кўпроқ.
Ўзбекистон бўйича барча чиқувчи қўнғироқлар ушбу алоқа операторларида деярли бир хил — дақиқасига 3 сент, фақатгина Beeline’нинг «Оддий» тариф режасида ушбу хизмат нархи 2 сентни ташкил этади. Учала алоқа операторида ҳам 1 Мб интернет нархи 10 сентни ташкил этади.
UMS’нинг «Старт» тариф режасида ҳар ой 100 Мб интернет траффик тақдим этилса, Beeline’да ҳисобни 2,99 долларга тўлдирилганда бир ҳафта учун 200 дақиқа, Ucell’да эса 2—2,99 долларга ҳисоб тўлдирилганда бир ҳафта учун 200 дақиқа ва 20 Мб интернет-траффик тақдим этилади.
UMS'нинг «Maxi» тариф режасини бошқа компаниялар нархлари билан солиштирамиз
UMS алоқа операторининг «Maxi» тариф режаси эса Beeline’нинг «Status Silver» ҳамда Ucell’нинг «Unlimited» тариф режалари билан ўхшаш бўлиб, қуйидаги жадвалда уларнинг нархини таққослаш мумкин.
Ucell’нинг «Unlimited» тариф режасида абонент тўлови UMS ва Beeline’дагига қараганда икки баробар баланд ва бу тарифга ўтиш учун 50 сент тўлаш зарур бўлади. Ўзбекистон бўйлаб қўнғироқлар учун Ucell тарифида ойига 3000 дақиқа, UMS’да 1000 ва Beeline’да 300 дақиқа тақдим этилади.
Ucell ойига тахминан 3000 та бепул SMS таклиф қилаётган бўлса, Beeline’да нисбатан кўпроқ — 3300 та SMS, аммо уларнинг фақатгина 300 тасини Ўзбекистон бўйича жўнатиш мумкин. Қолган 3000 таси тармоқ ичида жўнатиш учун тақдим этилган. UMS’нинг «Maxi» тарифида эса бепул SMSлар мавжуд эмас.
Учала алоқа операторида бошқа чиқиш қўнғироқлари ва SMS/MMS жўнатиш нархлари деярли бир хил. Бироқ, энг кўп ойлик бепул интернет траффигини UMS тақдим этмоқда. Бунда UMS алоқа оператори Beeline’дан икки баробар, Ucell’дан эса 25 фоиз кўп ойлик интернет трафигини бепул тақдим этади.
Қўшимча: Beeline’нинг «Браво Ооо» тарифига ўтиш бепул, бироқ ҳисобда 2 доллар бўлиши зарур. Шунингдек, ушбу тарифда ҳисоб ҳар 2,99 долларга тўлдирилганда, 7 кун давомида 200 ва дам олиш кунлари учун 200 дақиқа тақдим этилади.
Изоҳ (0)