«Насаф» жамоаси бош мураббийи хизмат сафари билан Санкт-Петербургда бўлиб турибди

«Насаф» ПФК матбуот хизмати раҳбари Азиз Нурийнинг берган маълумотларига қараганда «Насаф» жамоаси бош мураббийи Рўзиқул Бердиев куни кеча Санкт-Петербургда Европа чемпионлар лигасидан ўрин олган «Зенит» ва «Бенфика» клублари ўртасидаги учрашувни бевосита стадионда томоша қилган, деб хабар беради «Voha.uz».

Маълум бўлишича, Рўзиқул Бердиев фақатгина шу мақсадда у ерга ташриф буюрмаган. Ушбу мутахассиснинг хизмат сафари дастурида «Зенит» клубининг мураббийлар штаби иш фаолияти, клуб инфратузилмаси, футбол академияси фаолияти билан танишиш ва бошқа масалалар ўрин олган.

Рўзиқул Бердиевнинг хизмат сафари 30 ноябрь куни ўз ниҳоясига етади ва у Ўзбекистонга қайтиб келади.