УЕФА келишилган ўйинларга қарши мобил илова ишлаб чиқди

УЕФА ташкилоти келишилган ўйинларга қарши курашиш мақсадида iPhone, iPad ва Android операцион тизимидаги платформалар учун мўлжалланган махсус мобил илова ишлаб чиқди, деб хабар бермоқда «Uff.uz».

Ушбу мобил илова етти хил тилда бўлиб, унда келишилган ўйинлар ҳақида турли маълумотлар, видеоматериаллар, кўп сўраладиган саволларга жавоблар мавжуд.

Шунингдек, келишилган ўйин ҳақида бирор бир маълумотга эга бўлган ҳар бир инсон ушбу илова орқали УЕФА ташкилотига хабар бериш имкониятига эга. Иловада махсус электрон почта ҳам мавжуд бўлиб, унга Европа футбол иттифоқидан жавоб хати келиши мумкин.

Мазкур мобил иловани App Store (iPhone) ёки Google Play (Android) электрон дўконларидан юклаб олиш мумкин. Бунинг учун «Излаш» деган жойга «UEFA Integrity» калит сўзини киритиш талаб этилади.

Шунингдек, УЕФА ташкилоти келишилган ўйинлар ҳақида бирор маълумотга эга бўлган инсон хабар бериши мумкин бўлган телефон рақамларини ҳам жорий қилди. Хабар берувчининг шахси яширин қолиши кафолатланган.