Туркия президенти аёл ва эркак тенг бўлолмаслигини таъкидлади

Туркия президенти Ражаб Тойиб Эрдўған Истанбулда ўтказилган аёллар ҳуқуқ ва эркинликларига бағишланган халқаро анжуманда аёл киши эркак билан тенг бўлолмайди, деб ҳисоблашини, чунки бу табиат қонунларига зид бўлишини маълум қилди, деб хабар бермоқда «Segodnya.ua».

«Эркак ва аёл ўртасидаги қандайдир тенглик ҳақида гапиришади. Эркакларнинг ўғил болалар билан тенглиги ҳақида гапириш мумкин. Аёллар фақат аёллар билан тенг бўлади. Эркак ва аёл ҳуқуқларининг тенглиги ҳақида гапириб бўлмайди, чунки бу табиатга зид келади», − деди Эрдўған.

Шунингдек, Туркия президенти мамлакатдаги феминизм ҳаракатини ҳам танқид қилди. Унинг фикрича, феминизм оналик ғоясини инкор қилади. Эрдўғаннинг сўзларига кўра, эркак ва аёлнинг биологик фарқлари улар ҳаётда бир хил функцияларни бажара олмаслигини англатади.

«Динимиз (ислом) аёлнинг ҳаётдаги ўрнини аниқлаб берган − оналик. Баъзилар буни тушунади, бошқалар эса тушунолмайди. Сиз буни феминистларга тушунтиролмайсиз, чунки улар оналик ғоясини қабул қилолмайди», − деди Туркия президенти.