Россияда 100 минг киши томонидан Муҳаммад (с.а.в) пайғамбарга бағишланган китобни ёзиш лойиҳаси бошланди

Россияда Муҳаммад (с.а.в) пайғамбарга бағишланган электрон китоб энг кўп сонли муаллифлар томонидан ёзилиши бўйича ноёб ижтимоий лойиҳа − «100К Муҳаммад» лойиҳаси бошланди, деб хабар бермоқда «РИА Новости».

Лойиҳа муаллифи бўлган Ummagazine кундалик интернет-нашри хабарида айтилишича, 100 минг киши инсонларнинг энг яхшиси ҳақида дунёдаги энг фойдали китобни ёзади.

Лойиҳанинг асосий мақсади одамларга ўзларининг сўнгги пайғамбарга бўлган муҳаббатини ифодалаш имконини бериш эканлиги айтилган. Лойиҳа ёрдамида кўплаб инсонлар Муҳаммад (с.а.в.) ҳақида билиб олишлари ҳам кўзланган. Бундан ташқари, энг кўп сонли ҳаммуаллифлар иштирокида китоб ёзиш бўйича Гиннеснинг рекордлар китобига кириш ҳам режалаштирилган.

Турли мамлакатларда яшовчи 100 минг киши томонидан юборилган Муҳаммад (с.а.в) ҳақидаги иқтибослар «Инсонларнинг энг яхшиси − Муҳаммад (с.а.в.). 100 000 иқтибос. 100 000 муаллиф. 1 китоб» номли китобда чоп этилади. Лойиҳада иштирок этиш учун рўйхатдан ўтиш ва Муҳаммад (с.а.в.) тўғрисидаги иқтибосларни ўз она тилида йўллаши лозимлиги кифоя қилиши таъкидланган.

Ҳозирда рус ва инглиз тилларида ишга туширилган лойиҳа турк, араб, немис ва француз тилларида ҳам фаолият кўрсатишни бошлаши кўзда тутилган. Китоб тузилиши якунлангач нафақат iOs ва Android тизимлари учун электрон шаклда, балки босма шаклда ҳам чоп этилиши режалаштирилган.